(រាជធានីភ្នំពេញ)៖ នាព្រឹកថ្ងៃទី៧ ខែសីហា ឆ្នាំ២០២៦ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីប្រធានក្រុមប្រឹក្សាអ្នកច្បាប់ និងជាប្រធានគណៈកម្មាធិការដឹកនាំការកែទម្រង់ច្បាប់ បានអញ្ជើញដឹកនាំកិច្ចប្រជុំអន្តរក្រសួងចង្អៀត ដើម្បីពិភាក្សាលើគោលការណ៍ណែនាំស្តីពីការរៀបចំប្រកាស ប្រកាសអន្តរក្រសួង និងប្រកាសរួម របស់ក្រសួង ស្ថាប័ន ដោយមានការចូលរួមពីសំណាក់ឯកឧត្តម លោកជំទាវ ជារដ្ឋមន្រ្តី, រដ្ឋលេខាធិការ, អនុរដ្ឋលេខាធិការក្រសួង ស្ថាប័ន និងមន្រ្តីជំនាញការងារនីតិកម្មជាច្រើនរូប។ ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត មានប្រសាសន៍ថា កិច្ចប្រជុំនេះមានគោលបំណងធ្វើការពិគ្រោះយោបល់ និងប្រមូលគំនិត, ទស្សនៈ និងការតម្រង់ទិស ដើម្បីរៀបចំជាគោលការណ៍ណែនាំមួយ ពិសេសការកំណត់វិសាលភាព, គោលការណ៍, ទម្រង់ និងខ្លឹមសារ ព្រមទាំងនីតិវិធីអនុវត្ត ក្នុងការរៀបចំប្រកាស ប្រកាសអន្តរក្រសួង និងប្រកាសរួម របស់ក្រសួង ស្ថាប័ន។ ឯកឧត្តមឧបនាយករដ្ឋមន្រ្តីប្រចាំការបានបន្តថា ការពិគ្រោះយោបល់ក្នុងកិច្ចប្រជុំនាថ្ងៃនេះ អាចចាត់ទុកថា ជាការចាប់ផ្តើមមួយ ដើម្បីពង្រឹងសណ្តាប់ធ្នាប់គតិយុត្តនិងសណ្តាប់ធ្នាប់ស្ថាប័ន ដែលនឹងនាំទៅដល់ការធានាបាននូវសន្តិសុខគតិយុត្តជាពិសេសការគិតគូរដល់ផលប៉ះពាល់ជាវិជ្ជមានលើជីវភាពរស់នៅរបស់ប្រជាជន ធុរជន និងវិនិយោគិន ក៏ដូចជាសេដ្ឋកិច្ចមូលដ្ឋាន។ ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត មានប្រសាសន៍បន្ថែមថា អនុក្រឹត្យលេខ១៧០ អនក្រ.បក ចុះថ្ងៃទី២៣ ខែកក្កដា ឆ្នាំ២០២៤ ស្តីពីការដាក់ឱ្យអនុវត្តគោលការណ៍ណែនាំស្តីពីនីតិវិធីនិងវិធាននៃការតាក់តែងសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត […]
