ឯកឧត្តម ទិត សុធា ណែនាំឱ្យមន្ត្រីចុះមូលដ្ឋានក្នុងឃុំកំពង់ស្វាយបន្តធ្វើអំពើល្អដើម្បីបម្រើផលប្រយោជន៍គណបក្ស
កាលពីរសៀលថ្ងៃទី២២ ខែសីហា ឆ្នាំ២០២៦ នៅស្នាក់គណបក្សប្រជាជនកម្ពុជា ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ក្នុងឱកាសអញ្ជើញជាអធិបតីជួបសំណេះសំណាល និងប្រគល់សេចក្តីសម្រេចស្តីពីការកែសម្រួលសមាសភាពក្រុមការងារចុះមូលដ្ឋានឃុំកំពង់ស្វាយ ឯកឧត្តម ទិត សុធា សមាជិកគណៈកម្មាធិការកណ្តាលនិងជាប្រធានក្រុមការងារគណៈពង្រឹងឃុំកំពង់ស្វាយ បានបញ្ជាក់ប្រាប់ទៅក្រុមការងារចុះមូលដ្ឋានក្នុងឃុំ សូមមានការប្តេជ្ញាចិត្តខ្ពស់ និងខិតខំពង្រឹងការងារចុះមូលដ្ឋានឱ្យបានសកម្ម ដើម្បីប្រៀបឈ្នះជូនគណបក្សប្រជាជនកម្ពុជាក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៦ ដែលនឹងប្រព្រឹត្តទៅនៅថ្ងៃទី៦ ខែមិថុនា ឆ្នាំ២០២៧ខាងមុខ។
ឯកឧត្តម ទិត សុធា បានបន្ថែមថា ដើម្បីដណ្តើមជ័យជម្នះសម្រាប់ការបោះឆ្នោតខាងមុខបានទទួលជោគជ័យ លុះត្រាតែក្រុមការងារទាំងអស់ ទាំងក្រុមការងារចុះមូលដ្ឋាន និងក្រុមការងារគណបក្សដែលនៅមូលដ្ឋាន ភូមិ ឃុំ មានការសាមគ្គីភាពគ្នាជាធ្លុងមួយ និងមានការចូលរួមពីមន្ត្រីគណបក្សគ្រប់រូប ឯកភាពនិងរួមកម្លាំងគ្នាខិតខំធ្វើអំពើល្អដើម្បីបម្រើប្រជាជនចាប់ពីពេលនេះតទៅឱ្យបានសកម្ម ខ្លាំងក្លានិងត្រូវរួមគ្នាចុះផ្ទាល់នៅក្នុងមូលដ្ឋាននិងតាមខ្នងផ្ទះ ស្វែងយល់អំពីសតិអារម្មណ៍ និងបញ្ហាប្រឈមនានានៅក្នុងមូលដ្ឋាននិងរិះរកវិធានការដោះស្រាយ ឆ្លើយតបទៅនឹងសំណើ សំណូមពរចាំបាច់របស់ប្រជាជនឱ្យបានទាន់ពេលវេលា។
ក្នុងន័យនេះ ក្នុងនាមជាមន្ត្រីគណបក្សគ្រប់រូប ត្រូវបង្កើនសកម្មភាពចិញ្ចឹមចលនាក្នុងមូលដ្ឋានដែលខ្លួនទទួលខុសត្រូវ ត្រូវមានផែនការច្បាស់លាស់ក្នុងការចុះជួបផ្ទាល់ជាមួយសមាជិកគណបក្ស និងប្រជាជននៅក្នុងភូមិ ក្រុម តាមខ្នងផ្ទះ ដើម្បីបង្កើនភាពជិតស្និទ្ធ យល់ដឹងពីបញ្ហាសុខទុក្ខ និងបញ្ហាប្រឈមរបស់ប្រជាជន ជំរុញដោះស្រាយនិងស្វែងរកកិច្ចអន្តរាគមន៍តាមជំនាញ និងក្នុងសមត្ថកិច្ចការងារដោយឈរលើស្មារតីសហការដោះស្រាយជូនប្រជាជនឱ្យបានទាន់ពេលវេលា ទាំងបញ្ហាសេដ្ឋកិច្ច ក៍ដូចជាជីវភាពរស់នៅប្រចាំថ្ងៃរបស់ពួកគាត់។ ការធ្វើបែបនេះ គឺក្នុងគោលដៅពង្រឹង និងបង្កើនការគាំទ្រ និងការជឿទុកចិត្តថែមទៀតពីសំណាក់ប្រជាជនម្ចាស់ឆ្នោតដែលជាសមាជិកមកលើគណបក្ស ក្នុងន័យ «សមាជិកគណបក្ស១រូប គឺជាសំឡេងឆ្នោត១សន្លឹក ជាសន្លឹកឆ្នោតបានការ» និងពួកគាត់បានមើលឃើញច្បាស់នូវការបម្រើពួកគាត់ដោយស្មោះត្រង់ គឺជាទំនុកចិត្តដែលប្រជាជនក៏នឹងត្រៀមខ្លួនដើម្បីទៅបោះឆ្នោតគាំទ្រគណបក្សយើងនៅពេលខាងមុខផងដែរ។ ការបន្តធ្វើអំពើល្អឥតឈប់ឈរដើម្បីបម្រើផលប្រយោជន៍គណបក្សនិងបន្តកសាងកម្លាំងគាំទ្របក្សបន្ថែមទៀត ជាកាតព្វកិច្ចរបស់មន្ត្រីបក្សដែលចុះផ្ទាល់នៅក្នុងមូលដ្ឋាន។
បន្ថែមលើនេះ ឯកឧត្តម ទិត សុធា ក៏បានក្រើនរំលឹកដល់មន្ត្រីមូលដ្ឋានត្រូវយកចិត្តទុកដាក់លើការផ្តល់សេវាគ្រប់ប្រភេទប្រកបដោយគុណភាព និងប្រសិទ្ធភាព ដូចជាសេវាសន្តិសុខសណ្តាប់ធ្នាប់ សេវាប្រជាពលរដ្ឋ សេវាសង្គម អប់រំ សុខាភិបាល សេវាយុត្តិធម៌ ការដោះស្រាយទំនាស់ក្រៅប្រព័ន្ធតុលាការ សេវាសុរិយោដី ក៏ដូចជាសេវាចាំបាច់ជាច្រើនទៀតដើម្បីសម្រួលដល់ការប្រកបមុខរបរនិងលើកកម្ពស់ជីវភាពរស់នៅរបស់ប្រជាជនក្នុងមូលដ្ឋាន។
ការពង្រឹងសកម្មភាពចុះមូលដ្ឋាន ដោយក្តាប់បាននូវបញ្ហាអាទិភាពនិងដោះស្រាយបានទាន់ពេលវេលា លុះត្រាតែមន្ត្រីគ្រប់រូបបង្កើនការទទួលខុសត្រូវ និងអនុវត្តនូវតួនាទី ភារកិច្ចរបស់ខ្លួនឱ្យបានល្អនិងដើរតួនាទីស្នូលក្នុងការពង្រឹងសាមគ្គីភាព ឯកភាពផ្ទៃក្នុង ខិតខំបម្រើប្រជាជនដោយស្មោះត្រង់ គោរពច្បាប់ ធ្វើអំពើល្អគ្រប់កាលៈទេសៈ មានគុណធម៌ និងសីលធម៌ខ្ពស់ ព្រមទាំងបន្តកសាងទំនាក់ទំនងល្អជាមួយប្រជាជន ទើបបានទទួលនូវការស្រឡាញ់ចេញពីបេះដូងរបស់ប្រជាជន សំដៅលើកកម្ពស់ប្រជាប្រីយភាពនិងបង្កើនការជឿជាក់មកលើគណបក្សគណបក្សប្រជាជនកម្ពុជាយើង៕
