សហព័ន្ធកីឡាបាល់ទាត់កម្ពុជា (FFC) ផ្តួចផ្តើមប្រកួតលីគយុវជនដើម្បីសម្រេចបំណងនាំកម្ពុជាឆ្ពោះទៅ World Cup ឆ្នាំ២០៣៨

សហព័ន្ធកីឡាបាល់ទាត់កម្ពុជា (FFC) បានផ្ដួចផ្ដើមឱ្យមានការប្រកួតខេមបូឌានលីគយុវជន U16 និង U19 ដើម្បីចម្រាញ់យកកីឡាករមានទេពកោសល្យ ចូលរួមប្រកួតជើងឯកអាស៊ាន AFF Youth Championship ទាំង U16 និង U19 និងក្នុងគោលដៅនាំក្រុមជម្រើសជាតិកម្ពុជាឆ្ពោះទៅ FIFA World Cup ឆ្នាំ២០៣៨។

លោក កែវ សារ៉េត អគ្គលេការធិការ FFC បានឱ្យដឹងថា FFC បង្កើតព្រឹត្តិការណ៍នេះឡើង ក្នុងបំណងឱ្យកីឡាករដែលជាយុវជនមានឱកាសប្រកួតប្រជែងសមត្ថភាព និងដើម្បីឱ្យបណ្ដាក្លឹបបាល់ទាត់និងសហព័ន្ធអាចរកបានកីឡាករណាដែលមានទេពកោសល្យនិងសមត្ថភាព នឹងអាលជ្រើសចូលក្លឹប និងចូលរួមជាមួយក្រុមជម្រើសជាតិបាន។

ទន្ទឹមនឹងនេះ ខេមបូឌានលីគយុវជន ត្រូវបានបង្កើតឡើងដោយផ្តោតលើកត្តា ៣ សំខាន់ៗ ដូចខាងក្រោម៖
១- ដើម្បីឱ្យកីឡាករក្មេងៗមានឱកាសប្រកួតប្រជែង
២- ដើម្បីឱ្យតាមបណ្តាក្លឹប អាចចម្រាញ់យកកីឡាករមានទេពកោសល្យទៅប្រកបអាជីព ឱ្យស្របតាមលក្ខខណ្ឌសហព័ន្ធកីឡាបាល់ទាត់អាស៊ី (AFC)
៣- ដើម្បីជ្រើសរើសកីឡាករចូលក្រុមជម្រើសជាតិ សម្រាប់ការប្រកួតជើងឯកអាស៊ាន ដែលនឹងធ្វើឡើងនៅឆ្នាំ២០២៤នេះ។

នេះជាការបញ្ជាក់របស់លោកអគ្គលេខាធិការ ស្របពេលដែលការងារទាំងអស់នេះគឺជាផ្លូវឆ្ពោះទៅសម្រេចក្តីស្រមៃ ក្នុងការនាំក្រុមគោព្រៃកម្ពុជាឱ្យទៅបង្ហាញមុខនៅជុំចុងក្រោយនៃ FIFA World Cup ឆ្នាំ២០៣៨។

លោក កែវ សារ៉េត បានសង្កត់ធ្ងន់ថា មូលហេតុដែល FFC សម្រេចរៀបចំការប្រកួត U16 និង U19 ក្នុងពេលតែមួយ ដោយសារស្ថាប័នពិបាកក្នុងការញែកពេលវេលា និងដើម្បីកុំឱ្យប៉ះពាល់ដល់ការសិក្សារបស់កីឡាករក្មេងៗ ហើយជាពិសេសដើម្បីសន្សំថវិការដែលទទួលបានពី FIFA ផងដែរ។

សូមជម្រាបជូនថា ការប្រកួតប្រជែងនឹងចាប់ផ្ដើមពីថ្ងៃទី១៩ ខែឧសភា ឆ្នាំ២០២៤ តទៅ ដោយមានការចូលរួមពីសមាគម និងក្លឹបបាល់ទាត់ចំនួន១១ សរុបចំនួន២០ក្រុម៕