សម្តេចធិបតី ហ៊ុន ម៉ាណែត៖ ក្រសួងមុខងារសាធារណៈ សម្រេចបាននូវសមិទ្ធផលការងារជាច្រើនក្នុងរយៈពេល១ឆ្នាំចុងក្រោយនេះ

នៅក្នុងឱកាសអញ្ជើញជាអធិបតី បិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងមុខងារសាធារណៈ នៅរសៀលថ្ងៃទី៤ ខែមេសា ឆ្នាំ២០២៤ នេះ សម្តេចមហាបវរធិបតី ហ៊ុន ម៉ាណែត បានថ្លែងថា រាជរដ្ឋាភិបាលបានប្រគល់បេសកកម្មដ៏មានសារៈសំខាន់ ដល់ក្រសួងមុខងារសាធារណៈ នៅក្នុងការដឹកនាំ និងគ្រប់គ្រងវិស័យមុខងារសាធារណៈ និងការកែទម្រង់រដ្ឋបាលសាធារណៈ។

សម្តេចធិបតី ហ៊ុន ម៉ាណែត បានថ្លែងបន្តថា ផ្អែកលើសេចក្តីទុកចិត្តនេះ ក្រសួងមុខងារសាធារណៈ បានខិតខំបំពេញការងារសម្រេចបាននូវសមិទ្ធផលជាបន្តបន្ទាប់យ៉ាងច្រើនគួរជាទីកត់សម្គាល់ដូចជា៖

• ការគាំទ្រដល់ការគ្រប់គ្រង និងអភិវឌ្ឍន៍វិស័យមុខងារសាធារណៈទាំងនៅថ្នាក់ជាតិ និងថ្នាក់ក្រោមជាតិ
• ការកែទម្រង់ប្រព័ន្ធបៀរវត្សរ៍សម្រាប់មន្រ្តីរាជការស៊ីវិល កងកម្លាំងប្រដាប់អាវុធ មន្រ្តីជាប់កិច្ចសន្យា និងមន្រ្តីដ៏ទៃទៀត
• ការកែលម្អប្រព័ន្ធសោធននិវត្តន៍សម្រាប់អតីតមន្រ្តីរាជការស៊ីវិល និងអតីតយុទ្ធជន នៅក្នុងការអភិវឌ្ឍសមត្ថភាពមន្រ្តី និងស្ថាប័ន
• ការជំរុញ និងកែលម្អគុណភាពនៃការផ្តល់សេវាសាធារណៈ ព្រមទាំងការលើកកម្ពស់ភាពជាដៃគូនៃអង្គភាព ផ្តល់សេវាសាធារណៈ។