ឯកឧត្តម នួន ផារ័ត្ន បានក្រើនរំលឹកប្អូនៗសិស្សានុសិស្សខិតខំរៀនសូត្រឱ្យមានចំណេះ ជំនាញស្របទៅនឹងបរិបទនៃការវិវឌ្ឍសង្គម និងចូលរួមអភិវឌ្ឍប្រទេសជាតិ

ឯកឧត្តម នួន ផារ័ត្ន បានក្រើនរំលឹកប្អូនៗសិស្សានុសិស្សខិតខំរៀនសូត្រឱ្យមានចំណេះ ជំនាញស្របទៅនឹងបរិបទនៃការវិវឌ្ឍសង្គម និងចូលរួមអភិវឌ្ឍប្រទេសជាតិ។ ប្រសាសន៍ដ៏មានអត្ថន័យនេះ លើកឡើងនៅក្នុងពិធីសម្ពោធដាក់ឱ្យប្រើប្រាស់ក្លោងទ្វារ និងសមិទ្ធផលនានាក្នុងសាលាបឋមសិក្សា-អនុវិទ្យាល័យថ្នល់បែក ស្ថិតនៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ នៅព្រឹកថ្ងៃទី១៥ ខែកក្កដា ឆ្នាំ២០២៤។

ឯកឧត្តមអភិបាលខេត្តកំពង់ធំ បន្តថា ការពង្រឹងវិស័យអប់រំនេះ ទាមទារឱ្យមានការយកចិត្តទុកដាក់ពីអ្នកអាណាព្យាបាល លោកគ្រូ អ្នកគ្រូ និងសាម៉ីខ្លួន ក្នុងការតាំងចិត្តខិតខំរៀនសូត្រ។ ទន្ទឹមនោះ ឯកឧត្តមបានបន្តទៀតថា សូមប្អូនៗសិស្សានុសិស្ស ខិតខំរៀនសូត្រដើម្បីមានចេះដឹង រៀនឱ្យយល់អំពីទ្រឹស្តីហើយអនុវត្តឱ្យបានត្រឹមត្រូវ និងរៀនធ្វើជាមនុស្សល្អ មានសីលធម៌ល្អ ជាគម្រូគេ ទាំងការរស់នៅ ការសិក្សារៀនសូត្រ ដើម្បីចូលរួមចំណែកអភិឌ្ឍខេត្តកំពង់ធំ ក៏ដូចជាអភិវឌ្ឍន៍ប្រទេសជាតិមានការរីកចម្រើនទៅមុខ។

ឯកឧត្តម នួន ផារ័ត្ន បន្ថែមទៀតថា ប្រទេសជាតិមានការរីកចម្រើនទៅមុខ លុះត្រាតែប្រទេសជាតិមានធនធានមនុស្សល្អ ពោរពេញទៅដោយថាមពល ចំណេះដឹង ចំណេះធ្វើ មានសីលធម៌ល្អ មានទំនាក់ទំនងល្អ។ ដូច្នេះ សូមយើងទាំងអស់គ្នា រួមគ្នាគិត រួមគ្នាធ្វើ ដើម្បីអភិវឌ្ឍធនធានមនុស្ស និងអភិវឌ្ឍខេត្តកំពង់ធំ ឱ្យមានការរីកចម្រើន លើកកម្ពស់ជីវភាពប្រជាពលរដ្ឋបានកាន់ល្អប្រសើរថែមទៀត។

លោក អ៊ុត វណ្ណរ៉ា អភិបាលស្រុកកំពង់ស្វាយ បានលើកឡើងថា សាលាថ្នល់បែកត្រូវបានបង្កើតឡើងនៅឆ្នាំ១៩៧៩ ស្ថិតនៅក្នុងភូមិថ្នល់បែក ឃុំត្រពាំងឬស្សីស្រុកកំពង់ស្វាយ ខេត្តកំពង់ធំ ដែលមានភូមិចំណុះចំនួន០៧ គឺ ភូមិថ្នល់បែក ភូមិថ្នល់បែក(ក) ភូមិត្រពាំងចំបក់ ភូមិរូង ភូមិស្នោ ភូមិសិរីវង្ស និងភូមិល្វែ។ បច្ចុប្បន្ននេះសាលាថ្នល់បែក ត្រូវបានចែកជាបីកម្រិត គឺមានកម្រិតមត្តេយ្យសិក្សា (ដែលបានក្លាយទៅជា មត្តេយ្យធនធាន ចាប់ពីឆ្នាំ២០១៥មក) កម្រិតបឋមសិក្សា និងមធ្យមសិក្សា(កម្រិតអនុវិទ្យាល័យបានបង្កើតចាប់ពីឆ្នាំ២០០៣) មានអគារចំនួន០៨ខ្នងមាន គ្រួសរុប៤៣នាក់ ស្រី២៧នាក់ សិស្សសរុបចូលរៀនចំនួន១.០៥៨នាក់ ស្រី៥៣០នាក់អត្ថបទលោក ធូ កែវមុន្នី-ពិនិត្យនិងកែសម្រួលដោយអ៊ុមញឹប៕

ប្រភព៖ CPP News